Қазақша өлең: Жандарбек Жұман (Бойдақтың Анасына жазған хаты)

Менде бәрі тамаша, алаңдама,
Біраз нәрсе үйретті маған қала.
Сағаттардың сырғуы себеп болып,
Тәмамдауда оқуын балаң,мама!

Жаңа саты.Жаңа күн.Жаңа ғұмыр,
Жар іздеп ем төгетін жанары нұр.
Әлі үзбеп ем үмітті...жан табылды,
Жүректегі жазалар жараны бұл.

Көргенім жоқ: ұрысын, түк шатағын,
Дәл өзімдей қуанад, шықса атағым.
...Сұлулығын, мінезін қарап тұрып-
Әкемнің әйеліне ұқсатамын!

Сырларымды қайтемін ішке бекіп,
Той жасауға дайындал «кішкене» етіп.
Тағдырыма бір қызды кіргіздім мен,
Мерейімді жүретін үстем етіп.

Жүрегіме ол жанды салып қойдым,
Жетегінде кетпеспін қауіпті ойдың.
...Әкеме өзің айтарсың түсіндіріп,
Екеуіңе ақ келін тауып қойдым!